المشكله لاصرت .. محتاج .. لإنسان
بالحيل محتاجـه وهـو ماشقـى فيـك
والمشكله وأكبـر مصيبـه إلـى الأن
إذا عشقـت إنسـان يرفـض مباديـك
والمشكله لأشقيت نفسـك علـى شـان
إنسان (مايسـوى) تعبـك ومماشيـك
والمشكلـه لأعطيـت قلبـك لخـوان
همـه كـذا يلعـب .. وثـم ٍ يخليـك
والمشكلـه لاصـرت بالحـب ربـان
والمـوج خانـك ثـم خيّـب هقاويـك
والمشكله لاكنـت .. مانمـت سهـران
لجل ألذي أصغر طموحـه .. يبكيـك
والمشكله لاكـان هـو قـرّ الأعيـان
تشتـاق لـه دايـم وتلقـاه جافـيـك
والمشكله (وأكبر قهـر) إن الاحـزان
ماتلفـي إلا مـن يحـبـك ويغلـيـك
والمشكلـه خِلـك تجازيـه بإحسـان
ثـم تكتشـف انـه بغـدره يجازيـك
والمشكله لاقـال انـا وأنـت خـلان
ولا دار ظهره أعرف الخـل ناسيـك
والمشكله لاطحـت بإنسـان وإلسـان
يزعلك مـره ثـم يرجـع يراضيـك
والمشكلـه يانـاس لاكنـت غلطـان
ودك تصحـح موقفـك بـس ينهيـك
والمشكلـه لازاد صبـرك بالأزمـان
ولاقلت هانـت منـه كثـرت بلاويـك
والمشكله (موقفك) من صاحـب ٍ بـان
أتفه سبـب خـلاه يركـض يخاويـك
والمشكلـه لاكنـت بالحيـل مرضـان
وإدواك مع خلـك ويرفـض يداويـك
والمشكلـه لاكنـت بالحيـل ولـهـان
ودك بقربه.. بـس !! مـاوده يجيـك
والمشكله لاكنـت لـي حيـل شفقـان
وتلومني ومدري انـا كيـف أداريـك
والمشكله (وأكبـر جريمـه) إذا كـان
خلـك يحـب إنسـان دايـم يعاديـك
والمشكلـه لاغنّـو النـاس يــادآآآن
والحـزن مآلـي بالليالـي مخابـيـك
والمشكله لاكنت في بعـض الاحيـان
تلقـى مـن يشـوّه بفكـره معانـيـك
والمشكلـه حظـك إذا كـان( تعبـان)
أكيـد يظلمـك الدهـر ثـم يشقـيـك
وياشينهـا والله اذا طحـت يـافـلان
بين المشاكل كيـف تَثبـت خطاويـك
بس الأكيد أصبر .. ترى الصبر عنوان
وأعرف ترى لابد فـي يـوم ينجيـك
